តាយហោង​១

"«សង្ស័យណាស់! ផ្ទះនេះច្បាស់ជាមិនស្រួលហើយ» សំឡេងមនុស្សស្រីពីរនាក់អង្គុយនិយាយគ្នានៅក្នុងផ្ទះនោះទាក់ទាញការចង់ដឹងចង់ឮរបស់ម្ចាស់ផ្ទះកាន់តែខ្លាំងទើបគេផ្ទៀងត្រចៀកស្តាប់មិនឱ្យមានចន្លោះសូម្បីតែមួយពាក្យ។ «មិនស្រួលរឿងអ្វីមីង?» «គេថាសពដែលស្លាប់ដោយសារគ្រោះថ្នាក់ចរាចរណ៍គេមិនឱ្យយក មកធ្វើបុណ្យនៅក្នុងផ្ទះទេ វាជាខ្មោចតាយហោងកាចអាក្រក់ណាស់ ពីណាគេរាសីដាក់ដឹងតែវាកាច់យកតៗគ្នាមិនខាន»ស្ត្រីអ្នកនិយាយសង្កត់សំឡេងហាក់ទាមទារចំណាប់អារម្មណ៍ពីអ្នកស្តាប់ កាន់តែខ្លាំង។ «តែក្រែងពេលយកមកគេធ្វើពិធីអីស្រួលបួលតមីង» «ម៉ែអាពិធីទៀតក៏ឃាត់មិនជាប់ដែរ មិនអ៊ីចឹងមិនមែនគ្រាន់តែបុណ្យ៧ថ្ងៃមកដល់ភ្លាមក៏ស្លាប់ម្នាក់ទៀតទេ» «ទេ! គួរឱ្យជឿដែរហ្ន៎អ្នក...សម័យឥលូវនេះប្រមាថមិនបាន» «ហ្នឹងហើយបានជាគេចេះតែនិយាយថាអាគមផ្សំអាយូស បើមិនជឿកុំប្រមាថក្រែងវាបានចួបពិត» ម្ចាស់ផ្ទះឈរសម្លឹងមើលអ្នកជិតខាងដែលបំបែកផ្លូវគ្នាដើរចេញ ព្រមទាំងសម្លឹងមើលទៅកាន់តួផ្ទះរបស់ខ្លួនដោយអារម្មណ៍ច្របូកច្របល់ និងពោរពេញដោយសំណួរពេញខួរក្បាល។ តើជំនឿនេះវាមានពិតឬទេ?"